Գիտնականները ստեղծել են мРНК հիմքով արդյունավետ պատվաստանյութ ալերգիայի դեմ

Ամերիկացի հետազոտողները ներկայացրել են ալերգիայի դեմ նորարարական мРНК-թերապիա, որն օգտագործում է լիպիդային նանոմասնիկներ։ Աշխատանքի արդյունքները հրապարակվել են The Journal of Clinical Investigation (JCI) ամսագրում։ Գիտնականների խոսքով՝ այս մեթոդը կարող է կիրառվել թե՛ կանխարգելման, թե՛ արդեն զարգացած ալերգիկ հիվանդությունների բուժման համար։

Տեխնոլոգիայի գործողության մեխանիզմը հիշեցնում է COVID-19-ի мРНК պատվաստանյութերի աշխատանքը․ օրգանիզմ է ներմուծվում որոշակի ալերգեն կոդավորող мРНК, որը «փաթեթավորվում» է լիպիդային նանոմասնիկների մեջ։ Այս գործընթացը վերափոխում է իմունային արձագանքը՝ նվազեցնելով վտանգավոր IgE հակամարմինների և բորբոքային բջիջների քանակը և խթանելով պաշտպանիչ IgG-ի արտադրությունը, որն արգելափակում է ալերգենը։

Կենդանիների վրա փորձերը ցույց են տվել, որ թերապիան էապես նվազեցնում է շնչուղիների բորբոքումը, լորձի արտադրման ծավալը և ալերգիկ գերզգայունությունը՝ ներառյալ ձվի սպիտակուցի և փոշոտ տիզերի նկատմամբ։ Մեթոդը խոստանում է բացել անհատականացված պատվաստանյութերի ստեղծման հնարավորություններ ցանկացած ալերգենի դեմ՝ սկսած փոշուց մինչև տնային ալերգեններ։ Մարդկանց վրա փորձարկումները դեռ առջևում են, սակայն մասնագետները վստահ են, որ այս մոտեցումը կարող է փոխել ալերգիկ հիվանդությունների բուժման ապագան միլիոնավոր մարդկանց համար։