Մարզիչը 15 տարի շարունակ նկարահանել է երեխաներին Նիդեռլանդների ֆուտբոլային ակումբների հանդերձարաններում

Նիդեռլանդների դատախազությունը մեղադրանք է առաջադրել Վլիսինգենի 39-ամյա բնակչի՝ ֆուտբոլային ակումբների հանդերձարաններում անչափահասներին գաղտնի նկարահանելու համար, ըստ NL Times-ի։

Դեպքերը տեղի են ունեցել 2010-ից մինչև 2025 թվականի ապրիլը Զելանդիա նահանգի ակումբներում։ Կասկածյալը, որն աշխատել է որպես մարզիչ և սկաուտ, համակարգված կերպով նկարահանել է 10-14 տարեկան տղաներին մարզումներից հետո հագուստը փոխելու և լոգանք ընդունելու ժամանակ։ Հետաքննությունը պարզել է, որ բոլոր կադրերը պահվել են մեղադրյալի անձնական արխիվում և չեն տարածվել առցանց։

Տղամարդը նաև մեղադրվում է անչափահաս աշակերտի նկատմամբ սեռական ոտնձգության մեջ։ Հանցագործությունները կատարվել են մի քանի տարիների ընթացքում՝ սկզբում տարրական դպրոցում, որտեղ կասկածյալը աշխատել է որպես ուսուցիչ, ապա շարունակվել են միջնակարգ դպրոցում և իր սեփական տանը։ Ոստիկանության տվյալներով՝ այս գործով սեռական ոտնձգության միայն մեկ զոհ կա։

Մեղադրյալը նաև պաշտոնապես նկարահանել է Նիդեռլանդների ֆուտբոլային ասոցիացիայի միջոցառումներ մինչև 12 տարեկան երեխաների համար, ինչը նրան թույլ է տվել օրինական կերպով մասնակցել մարզումներին և մրցումներին։ Երկուշաբթի Միդդելբուրգի դատարանը հաստատել է նրա կալանքը։ Հաջորդ նախնական լսումը նշանակված է դեկտեմբերի 3-ին, իսկ հիմնական դատավարությունը կսկսվի հաջորդ տարվա գարնանը։

Թարգմանությունը՝ Lurer.com-ի