Թուրքիան պատասխանեց ԱՄՆ-ի՝ ռուսական նավթի ներմուծումը դադարեցնելու կոչերին

Թուրքիայի էներգետիկայի նախարար Ալփարսլան Բայրաքթարը հայտարարեց, որ ռուսական նավթի ներմուծման հարցը մշտապես որոշել է մասնավոր հատվածը՝ ոչ թե պետությունը։ Նա ընդգծեց, որ Անկարան չի սահմանափակում, թե որ երկրից կարող է տեղական բիզնեսը գնել նավթ՝ դա դիտարկելով որպես բացառապես կոմերցիոն որոշում։

Բայրաքթարը արձագանքեց Վաշինգտոնի պահանջին՝ դադարեցնել ռուսական նավթի ներկրումը՝ նշելով, որ Թուրքիայի կառավարությունը չի միջամտի մասնավոր ընկերությունների ընտրությանը։ Նախարարը հավելեց, որ Անկարան չի հրաժարվի նաև ռուսական գազի գնումներից և պատրաստվում է շարունակել էներգակիրների մատակարարման դիվերսիֆիկացիան։

Նշենք, որ այս հայտարարությանը նախորդել էր Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հանդիպումը, որի ընթացքում Վաշինգտոնը փորձել էր համոզել Անկարային հրաժարվել ռուսական նավթից, հայտնում է Лента.ру-ն։