Չժաո Հենլունը գնահատել է ռուսական MAX մեսենջերը՝ համեմատելով WeChat-ի հետ

Չինացի IT-փորձագետ Հենլուն Չժաոն հայտարարել է, որ ռուսական MAX մեսենջերը կարող է դառնալ Ռուսաստանի «WeChat»-ը։ Նա իր կարծիքը ներկայացրել է «Վեդոմոստի» պարբերականին տված մեկնաբանության մեջ՝ շեշտելով, որ նոր հարթակը ցուցաբերում է արագ աճի տեմպեր։

Չժաոն հիշեցրել է, որ WeChat-ը գործարկվել է 2011-ին և արդեն մեկ տարի անց ուներ 100 միլիոն օգտատեր՝ Չինաստանի բնակչության շուրջ յոթ տոկոսը։ 2013-ին հավելվածում ներդրվեցին վճարային գործառույթներ, և լսարանը հասավ 400 միլիոնի։ Նրա խոսքով՝ MAX-ը իր առաջին միլիոն օգտատերը գրանցեց հայտնվելուց ընդամենը մի քանի շաբաթ անց, իսկ այսօր Ռուսաստանում գրեթե յուրաքանչյուր չորրորդն ունի մեսենջերի հաշիվ։

Փորձագետը նշել է, որ MAX-ում գրանցվելն ավելի հեշտ է, քան WeChat-ում, քանի որ չինական հարթակում նոր օգտատիրոջը պետք է հաստատի արդեն գործող հաշիվ ունեցող անձը՝ որպես իրական մարդու ապացույց։