Կամերունի նախագահի աղջիկը TikTok-ում բացահայտորեն դեմ է գնացել հորը՝ պահանջելով փոփոխություններ երկրում

Կամերունի 92-ամյա նախագահ Պոլ Բիայի դուստրը՝ 27-ամյա Բրենդա Բիան, ցնցել է երկիրը իր TikTok-ի տեսանյութով՝ հայտարարելով, որ առաջիկա հոկտեմբերի 12-ի ընտրություններում չի քվեարկելու հոր օգտին։ Նախկինում շքեղ կյանքի ցուցադրություններով հայտնի Բրենդան՝ Rolex ժամացույցներով, Rolls-Royce-ով և մասնավոր ինքնաթիռներով լուսանկարներով, այս անգամ հանդես է եկել քննադատական ուղերձով՝ ասելով․ «Մի քվեարկեք Պոլ Բիայի օգտին, ոչ թե ինձ համար, այլ որովհետև նա շատերին տառապեցրել է»։

Բրենդան ընդգծել է, որ հրաժարվում է ընտանիքի աջակցությունից ու ֆինանսներից՝ հույս հայտնելով, որ Կամերունը կունենա նոր նախագահ։ Նրա խոսքերը արագ տարածվել են սոցիալական ցանցերում և Արևմտյան Աֆրիկայի լրատվամիջոցներում՝ հավաքելով միլիոնավոր դիտումներ։ Տեսանյութը, սակայն, հազիվ թե ազդի ընտրությունների ելքի վրա, քանի որ Բիան ղեկավարում է երկիրը արդեն 42 տարի և շարունակում է պահել իշխանությունը։

Տեսանյութից հետո Բրենդան հրապարակել է ներողություն՝ հորը կոչելով «մեծ մարդ» և հորդորելով հետևորդներին ինքնուրույն կարծիք կազմել։ Սա նրա երկրորդ հրապարակային բողոքի քայլն է․ մեկ տարի առաջ նա հանդես էր եկել որպես լեսբի, ինչն առաջացրել էր մեծ աղմուկ՝ հաշվի առնելով, որ Կամերունում համասեռամոլությունը պատժվում է մինչև հինգ տարվա ազատազրկմամբ։