Google-ը բացատրել է՝ ինչպես Android-ի համար հավելվածներ տեղադրել Google Play-ը շրջանցելով

Google ընկերությունը իր բլոգում պարզաբանել է, որ Android օգտատերերը կկարողանան տեղադրել հավելվածներ նաև Google Play-ից դուրս՝ նույնիսկ 2026-ից ուժի մեջ մտնող նոր սահմանափակումների պայմաններում։

Ըստ ընկերության՝ եթե հավելվածի ստեղծողը հրաժարվի անցնել պարտադիր վերիֆիկացիան, այն չի հասանելի լինի սովորական եղանակով, սակայն ծրագրավորողները կկարողանան տեղադրել այն իրենց սարքերում Android Studio գործիքի միջոցով՝ փորձարկման և կարգաբերման նպատակով։ «Դուք կարող եք շարունակել տեղային ձևով տեղադրել, թեստավորել և կարգաբերել հավելվածը՝ ինչպես էմուլյատորների, այնպես էլ ֆիզիկական սարքերի վրա, ինչպես դա արվում էր մինչ այժմ»,— նշված է հայտարարությունում։

Google-ը նաև ընդգծել է, որ առանց վերիֆիկացիայի հավելվածների տարածումը մյուս օգտատերերի համար գրեթե անհնար կլինի։ Աշնանը ընկերությունը հայտարարեց նաև Android ՕՀ-ի նոր գործառույթների մասին, որոնց թվում են՝ աուդիո ազդանշանի փոխանակում և թարմացված Gboard վիրտուալ ստեղնաշար։