Սերբիան ցանկանում է հնարավորինս շուտ դառնալ Եվրամիության լիիրավ անդամ. փոխվարչապետ

Սերբիան ցանկանում է հնարավորինս շուտ դառնալ Եվրամիության լիիրավ անդամ, հայտարարել է առաջին փոխվարչապետ և ֆինանսների նախարար Սինիշա Մալին՝ ելույթ ունենալով GLOBSEC Tatra 2025 գագաթնաժողովում:

«Սերբիան անդամակցության թեկնածու է, ուստի մենք դեռևս ԵՄ լիիրավ անդամ չենք, բայց մենք գրեթե նույն մարտահրավերների առջև ենք կանգնած, քանի որ ԵՄ-ն մեր հիմնական առևտրային գործընկերն է։ Եվ մենք ամեն ինչ անում ենք հնարավորինս շուտ ԵՄ անդամ դառնալու նպատակով», - Մալիի խոսքերն է մեջբերում «Tanjug» լրատվական գործակալությունը։

Մալիի խոսքով՝ ԵՄ-ն դեռևս չի մշակել հստակ ռազմավարություն՝ ապագայում մատչելի էներգիա ապահովելու համար։ «Անկեղծ ասած, Սերբիայի տեսանկյունից ես ԵՄ-ի համար հստակ ուղի չեմ տեսնում։ Գերմանիան հենց նոր շահագործման հանձնեց ածխային էլեկտրակայանների վեց գիգավատ հզորություն, Ֆրանսիան՝ մեկը, Հունաստանը՝ ևս մեկը։ Մենք բոլորս խոսել ենք կանաչ տնտեսության, կլիմայի փոփոխության և այդ ամենի մասին։ Սակայն մաքուր և մատչելի էներգիայի անհրաժեշտությունը պարզապես գերազանցում է մնացած բոլոր գաղափարները», - ընդգծել է նա։