Այս գիշեր Ուկրաինայի ուղղությամբ արձակվել է ավելի քան 500 ԱԹՍ և ավելի քան 50 հրթիռ, կան զոհեր. Զելենսկի

Կիրակի՝ հոկտեմբերի 5-ի գիշերը, Ռուսաստանը զանգվածային հարձակում է իրականացրել Ուկրաինայի մի քանի շրջանների վրա: Ուկրաինայի նախագահ Վլադիմիր Զելենսկին հայտնել է, որ ՌԴ զինված ուժերը արձակել են մոտ 500 հարձակողական անօդաչու թռչող սարք և ավելի քան 50 հրթիռ, այդ թվում՝ «Կինժալներ»։

Օդային հարվածների հետևանքով զոհվել է հինգ մարդ, մոտ 10-ը՝ վիրավորվել։ «Ռուսները կրկին թիրախավորել են մեր ենթակառուցվածքները, այն ամենը, ինչը ապահովում է մարդկանց բնականոն կյանքը։ Մեզ անհրաժեշտ է ավելի մեծ պաշտպանություն, բոլոր պաշտպանական համաձայնագրերի, մասնավորապես՝ օդային պաշտպանության վերաբերյալ, ավելի արագ իրականացում՝այս օդային ահաբեկչությունն իմաստազրկելու համար։ Երկնքում միակողմանի հրադադարը հնարավոր է, և դա կարող է հիմք հանդիսանալ իրական դիվանագիտության համար», - գրել է Զելենսկին սոցիալական ցանցերում։