Սերբիայի նախագահը նախազգուշացրել է սպասվող պատերազմի մասին

Սերբիայի նախագահ Ալեքսանդր Վուչիչը նախազգուշացրել է, որ ամբողջ աշխարհը պատրաստվում է պատերազմի, հաղորդում է Kurir-ը։

«Ամբողջ աշխարհում լիակատար քաոս և կոլապս է։ Ամեն ինչ ավելի բարդ կլինի աշխարհում, և որոշ հարցերում՝ նաև մեզ մոտ, պարզապես որովհետև մարդիկ պետք է հասկանան՝ բոլորը պատրաստվում են պատերազմի։ Իսկ երբ պատրաստվում են պատերազմի, նշանակում է՝ այն լինելու է։ Եվ երբ արդեն գիտենք, որ պատերազմը լինելու է — ես ձեզ ասում եմ, ես դա տեսնում եմ, տեսնում եմ՝ ինչպես է ամեն ինչ ընթանում և ինչպես են բոլորը պատրաստվում։ Ոչ ոք չի պատրաստվում բանակցությունների, միայն նայում են՝ ով ում կողմն է լինելու։ Փորում են իրենց խրամատները և սպասում մեկնարկին։

Եվ բոլորը գիտեն, որ պատերազմը մոտենում է, և պարզապես պատրաստվում են», — ասել է Վուչիչը՝ գնացքով Սուբոտիցա ուղևորվելիս։

Այսպես Սերբիայի նախագահը մեկնաբանել է Ռուսաստանի նախագահ Վլադիմիր Պուտինի ելույթը, որի ընթացքում վերջինս հայտարարել է, որ որոշ արևմտյան իշխանական կենտրոններ ցանկանում են ուժով փոխել իշխանությունը Սերբիայում և օգտագործում են երիտասարդությանը՝ ապակայունացման նպատակով։

«Ես երբեք չեմ ցանկացել չարաշահել նրա խոսքերը, ամեն ինչ պարզ է, դա մեծ գաղտնիք չէ։ Բավական է նայել, թե ինչպես է դա իրականացվել այլ երկրներում։ Նա ասաց այն, ինչ բոլորս գիտենք, և ես շնորհակալ եմ նրան դրա համար», — ասել է Վուչիչը։