Սարսափի տուն Նյու Յորքի մոտակայքում․ 95-ամյա կինը անմարդկային պայմաններում է պահվել

Նյու Յորքի իշխանությունները ձերբակալել են 57-ամյա Սամանտա Բոյդին՝ վայրի կենդանիների վերականգնողական բուժման հավաստագրված մասնագետին, այն բանից հետո, երբ նրա տանը հայտնաբերվել է ավելի քան 200 կենդանի՝ պահված հակասանիտարական պայմաններում, հաղորդում է NBC News-ը։

Ինչպես հայտնել են Սաֆֆոլք շրջանի դատախազության գրասենյակից, կինը մեղադրվում է կենդանիների նկատմամբ դաժան վերաբերմունքի և տարեց մարդու համար վտանգ ստեղծելու մեջ։

Հետաքննության տվյալներով, Բոյդի հետ բնակվել է նրա 61-ամյա զուգընկեր Նիլ Վեշլերը, ում նույնպես մեղադրանք է առաջադրվել կենդանիների նկատմամբ դաժան վերաբերմունքի համար։ Նորթպորտի Ֆորտ-Սալոնգա-ռոուդ փողոցում գտնվող տանը հոկտեմբերի 1-ին BEAST (Բիոլոգիական, բնապահպանական և կենդանիների պաշտպանության թիմը դատախազությանը կից) մասնագիտացված խմբի աշխատակիցները խուզարկություն են իրականացրել՝ կենդանիների «կուտակման համախտանիշի» մասին բողոք ստանալուց հետո։

Ստուգման ընթացքում նրանք հայտնաբերել են 206 արարած՝ ինչպես ընտանի, այնպես էլ վայրի՝ աքաղաղներ, սկյուռներ, բադեր, աղավնիներ, լորեր, ճագարներ, ագռավներ, սարյակներ, սագեր, գետնասկյուռներ, աղավնիներ, հավեր, համստերներ, կզաքիսներ, ծովախոզուկներ, ոզնիներ, դաշտամկներ, թռչող սկյուռներ, ալիքաձև թութակներ, կակադուներ, շինշիլաներ, կատուներ, կրիաներ, շներ, հնդկահավեր և այլ տեսակներ։ Նրանք բոլորը բնակվել են լեփ-լեցուն վանդակներում՝ կեղտի և թափոնների մեջ։

Բացի այդ, տանը գտնվել է 95-ամյա մի կին, որն ապրել է նույն պայմաններում։ Դրա պատճառով Բոյդին լրացուցիչ մեղադրանք է առաջադրվել «խոցելի տարեց անձի բարեկեցությանը վտանգ ստեղծելու» համար։

Շրջանային դատախազ Ռեյմոնդ Թիերնին տեղի ունեցածը անվանել է «չափազանց տագնապալի իրավիճակ» և ընդգծել, որ չնայած Բոյդի՝ որպես հավաստագրված վերականգնողական բուժման մասնագետի կարգավիճակին, նրա գործողությունները «վտանգել են ինչպես կենդանիներին, այնպես էլ մարդկանց»։