Էրդողանը կայցելի Ադրբեջան․ հռչակագիր կընդունվի

Թուրքիայի նախագահ Ռեջեփ Թայիփ Էրդողանը կայցելի Ադրբեջան։

Այս մասին իր սոցիալական ցանցերի էջում գրել է Թուրքիայի նախագահի աշխատակազմի հաղորդակցության բաժնի տնօրեն Բուրհանեթթին Դուրանը։

«Ադրբեջանի նախագահ Իլհամ Ալիևի հրավերով Ռեջեփ Թայիփ Էրդողանը 2025 թվականի հոկտեմբերի 7-ին կայցելի Ադրբեջան՝ մասնակցելու Թյուրքական պետությունների կազմակերպության 12-րդ գագաթնաժողովին, որը տեղի կունենա Գաբալայում», - նշվում է գրառման մեջ։

Միջոցառման ընթացքում, որը նվիրված կլինի «Տարածաշրջանային խաղաղություն և անվտանգություն» թեմային, նախատեսվում է քննարկել ԹՊԿ-ի ինստիտուցիոնալ կառուցվածքի ամրապնդման և կազմակերպության շրջանակներում համագործակցության ընդլայնման միջոցառումները։ Նախատեսվում է ընդունել տարբեր փաստաթղթեր և որոշումներ, այդ թվում՝ Գաբալայի հռչակագիրը։

Թուրքիայի առաջնորդը կմասնակցի Պետությունների ղեկավարների խորհրդի նիստին և երկկողմ հանդիպումներ կանցկացնի մասնակից երկրների պետությունների ու կառավարությունների ղեկավարների հետ։