Կրեմլը մերժում է ԵՄ-ի՝ անօդաչուների մասին անհիմն մեղադրանքները

Կրեմլը կտրականապես հերքել է Եվրամիության մի շարք քաղաքական գործիչների հայտարարությունները, որոնք անօդաչու թռչող սարքերի անսովոր թռիչքները կապում են Ռուսաստանի հետ։ ՌԴ նախագահի մամուլի քարտուղար Դմիտրի Պեսկովը ՏԱՍՍ-ին ասել է, որ այդ մեղադրանքները անհիմն և չհաստատված են։

Պեսկովը նշել է, որ ԵՄ-ում կան բազմաթիվ քաղաքական գործիչներ, ովքեր հակված են ցանկացած միջադեպի համար մեղադրել Ռուսաստանին՝ առանց փաստերի։ Նրա խոսքով՝ Մոսկվան նման հայտարարություններին լուրջ չի վերաբերվում։

Ավելի վաղ Գերմանիայի կանցլեր Ֆրիդրիխ Մերցը հայտարարել էր, թե Ռուսաստանը ներգրավված է Եվրոպայի տարբեր շրջաններում արձանագրված անօդաչուների մեծ մասի միջադեպերում։ Նա նշել էր, որ դրանք հիմնականում հետախուզական թռիչքներ են, զենք չեն կրում, սակայն նպատակ ունեն վախ սերմանել բնակչության մեջ և վտանգ են ներկայացնում անվտանգության համար։