ՌԴ Պետդումայում հայտարարել են՝ Հայաստանը եվրոպական հատուկ ծառայությունների ուշադրության կենտրոնում է

Վրաստանը, Հայաստանը և Ադրբեջանը Եվրամիության և եվրոպական հատուկ ծառայությունների ուշադրության կենտրոնում են, որոնք ձգտում են ոչնչացնել նրանց պետականությունը։ Այս մասին ՏԱՍՍ-ին ասել է ՌԴ Պետդումայի ԱՊՀ հարցերով, եվրասիական ինտեգրման և հայրենակիցների հետ հարաբերությունների կոմիտեի նախագահի առաջին տեղակալ Վիկտոր Վոդոլացկին՝ մեկնաբանելով Թբիլիսիում տեղի ունեցած անկարգությունները Վրաստանում տեղի ունեցած մունիցիպալ ընտրությունների ֆոնին։

«Նրանց համար ցանկացած հետխորհրդային պետություն ոչնչացման տարր է՝ գոյություն ունեցող մարդկային արժեքների և խորը պատմական արմատների ոչնչացման։ Նրանց նպատակն է արմատներից կտրել այդ ամենը, նոսրացնել այն և հետխորհրդային տարածքում գտնվող ցանկացած պետություն վերածել հոտի։ Հետևաբար, Հայաստանն ու Ադրբեջանը կենթարկվեն նույն գործողություններին, որոնց պատճառով ժամանակին Ուկրաինան «ընկավ»», - ասել է Վոդոլացկին։

Գործակալության զրուցակիցը հավելել է, որ Եվրամիությունը նմանատիպ քաղաքականություն է վարում նաև այլ երկրների նկատմամբ, որոնք «այժմ գտնվում են խաչմերուկում»։ Նա ընդգծել է, որ Ուկրաինան և այնտեղ տեղի ունեցածը օրինակ են այդ երկրների համար։