Ռուսական զանգվածային հարձակումը Ուկրաինայում խլեց հինգ մարդու կյանք․ վնասվել է էներգետիկ ենթակառուցվածքը

Ռուսաստանը գիշերը հրթիռներով և դրոններով հարվածել է Ուկրաինայի մի շարք շրջաններին՝ սպանելով առնվազն հինգ քաղաքացիական անձանց և վնասելով էներգետիկ օբյեկտներ ու բնակելի շենքեր, հաղորդում է Reuters-ը։

Լվովի մարզում, որը սահմանակցում է Լեհաստանին, զոհվել է մի ընտանիքի չորս անդամ, երբ հարվածից փլուզվել է նրանց տունը։ Տեղի իշխանությունների փոխանցմամբ՝ հարձակումը դարձել է պատերազմի ընթացքում ամենախոշորը Լվովի տարածաշրջանի վրա՝ ներառելով շուրջ 140 դրոն և 23 հրթիռ։ Մարզկենտրոնի արդյունաբերական պարկում բռնկվել է հրդեհ, քաղաքի մի մասը մնացել է առանց հոսանքի։

Զապորոժժիայում հրթիռա–դրոնային հարվածի հետևանքով մեկ մարդ է զոհվել, 10-ը՝ վիրավորվել, իսկ ավելի քան 73 հազար սպառող մնացել է առանց հոսանքի։ Վնասվել են նաև էներգետիկ օբյեկտներ Չերնիգովի, Իվանո-Ֆրանկովսկի, Վիննիցայի, Խերսոնի, Խարկովի և Օդեսայի շրջաններում։ Ուկրաինայի նախագահ Վլադիմիր Զելենսկին հայտնել է, որ ռուսական ուժերը կիրառել են ավելի քան 50 հրթիռ և մոտ 500 դրոն։ ՆԱՏՕ-ի անդամ Լեհաստանը բարձրացրել է իր օդային պաշտպանությունը՝ արձագանքելով սահմանային վտանգին։