Մարզերում արտակարգ իրավիճակների կանխարգելման և բնակչության պաշտպանությանն ուղղված միջոցառումների ամփոփում

Արտակարգ իրավիճակների կանխարգելման, պատրաստվածության մակարդակի բարձրացման նպատակով սեպտեմբեր ամսին Հայաստանի Հանրապետության բոլոր մարզերում իրականացվել են բնակչության պաշտպանության ուղղությամբ մի շարք կրթական, գործնական և ուսուցողական միջոցառումներ։ Դրանք ուղղված են եղել ինչպես դպրոցականների, ուսուցիչների և կազմակերպությունների աշխատակիցների իրազեկվածության բարձրացմանը, այնպես էլ տարբեր գերատեսչությունների և համայնքային կառույցների միջև համագործակցության խթանմանը։

Դպրոցներում, նախադպրոցական հաստատություններում, քոլեջներում և արտադրական ու առևտրային կազմակերպություններում անցկացվել են թեմատիկ դասընթացներ՝ «Հեղեղումների ժամանակ և հեղեղումներից հետո վարքականոնները», «Ազդարարման ազդանշանները», «Անվտանգ վարվելակերպի կանոնները», «Արտակարգ իրավիճակների առաջնային գործողությունների ճիշտ պատկերացումը և արդյունավետ իրականացումը», «Անվտանգ և ապահով կրթական միջավայր», «Դաշտերի և այգիների խոտի այրման վնասները և դրա կանխարգելման կարևորությունը», «Օդային տագնապ» ազդանշանի դեպքում բնակչության ազդարարման, պատսպարման և տարհանման կարգը, ինչպես նաև «Ինչ է երկրաշարժը և ինչի համար են օգտագործվում շչակները» թեմաներով։ Տեղերում իրականացվել է նաև իրազեկման աշխատանքներ՝ ուղեկցվելով տեղեկատվական «Երբ արտակարգ իրավիճակ է» գրքույկների տրամադրմամբ։

ՀՀ մարզերում կազմակերպվել և իրականացվել են նաև հատուկ տակտիկական ուսումնավարժություններ՝ նվիրված բնակչության և հաստատությունների անձնակազմի կողմից հրդեհաշիջման, տարհանման և փրկարարական գործողությունների ճիշտ ու արդյունավետ իրականացմանը։ Նման վարժանքներ կազմակերպվել են ինչպես դպրոցներում, այնպես էլ մանկապարտեզներում, քոլեջներում, ԱԳԼՃԿ-ներում և մասնավոր ընկերություններում։

Արտադրական բարձր ռիսկային օբյեկտներում, օրինակ՝ Ագարակի պղնձամոլիբդենային կոմբինատում, անցկացվել է վթարավերականգնողական աշխատանքների թեմայով ուսումնավարժություն՝ երկրաշարժի հետևանքով պոչամբարի պատվարի փլուզման սցենարով։

Մարզպետարաններում ստորաբաժանումների կողմից կազմակերպվել են հրամանատարական պատրաստության պարապմունքներ՝ մարզային շտաբերի և ՏԻՄ ներկայացուցիչների մասնակցությամբ։ Պարապմունքների շրջանակում մշակվել և քննարկվել են «Հայկական ԱԷԿ-ի վթարի դեպքում բնակչության ընդունման և տեղաբաշխման» և «Ուժեղ երկրաշարժի դեպքում բնակչության պաշտպանության միջոցառումների իրականացման» մեխանիզմները։

Շրջակա միջավայրի նախարարության էկոպարեկային ծառայության հետ համատեղ իրականացվել են անտառային տարածքներում հրդեհների մարման գործնական պարապմունքներ՝ ներառյալ սիմուլյացիոն վարժանքներ և հրդեհաշիջման կազմակերպման պրակտիկ գործողություններ։

Հանրակրթական հաստատություններում, ինչպես նաև քոլեջներում և առանձին կազմակերպություններում անցկացվել են տարհանման և պատսպարման գործնական վարժանքներ։ Շչակների գործարկմամբ ազդարարվել են վարժանքների մեկնարկները, որից հետո անձնակազմն ու աշակերտները կազմակերպված կերպով տարհանվել և պատսպարվել են նախապես սահմանված տարածքներում։ Վարժանքները հնարավորություն են տվել ոչ միայն տեսական գիտելիքները կիրառել պրակտիկայում, այլև փորձարկել ազդարարման համակարգերի աշխատանքը։

ՀՀ մարզերում իրականացված այս միջոցառումներն ուղղված են հանրային անվտանգության ամրապնդմանը, արտակարգ իրավիճակների կանխարգելմանն ու դրանց ժամանակ արագ և համակարգված արձագանքման կարողությունների զարգացմանը։ Այս աշխատանքները շարունակական բնույթ են կրում՝ նպատակ ունենալով բնակչությանը զինել անհրաժեշտ գիտելիքներով և հմտություններով՝ սեփական անվտանգությունն ապահովելու համար։