Սլովակիան և Ուկրաինան կառավարությունների մակարդակով բանակցություններ կվարեն

Սլովակիայի վարչապետ Ռոբերտ Ֆիցոն հայտարարել է, որ Սլովակիան և Ուկրաինան հոկտեմբերի 17-ին կառավարությունների մակարդակով բանակցություններ կանցկացնեն, հաղորդում է Aktuality պորտալը։

Սլովակիայի վարչապետի խոսքով՝ կառավարության մակարդակով հանդիպումից առաջ երկու երկրների մի քանի նախարարներ երկկողմ հանդիպումներ են ունենալու։ Կառավարության նիստը տեղի կունենա Միխալովցեում։

Ֆիցոն պարզաբանել է, որ պաշտպանության նախարար Ռոբերտ Կալինակի այցը Ուկրաինա դիտարկում է՝ որպես կառավարության նիստի նախապատրաստական ​​աշխատանքների մի մաս։

«Ես փոխվարչապետի այցը դիտարկում եմ՝ որպես կառավարության կողմից հոկտեմբերի 17-ին Միխալովցեում կայանալիք հանդիպման նախապատրաստական ​​աշխատանքների մի մաս։ Ոչինչ ավելին, ոչ մի հատուկ բան», - հայտարարել է վարչապետը։