Գիտնականները զգուշացնում են․ թռչունների միգրացիոն փոփոխությունները կարող են վտանգել մարդկության ապագան

Ամերիկացի գիտնականները հայտնաբերել են, որ մի շարք թռչուններ սկսել են փոխել միգրացիոն ուղիները կամ նույնիսկ հրաժարվում են երկար թռիչքներից։ Կոռնելի համալսարանի միգրացիոն էկոլոգ Էնդրյու Ֆարնսուորթը NBC Connecticut-ին ասել է, որ այս փոփոխությունները կարող են լուրջ սպառնալիք ներկայացնել մարդկության համար։

Փորձագետները պատճառներից առանձնացնում են քաղաքների աճը, անտառների և դաշտերի պեստիցիդային մշակումները, ինչպես նաև կլիմայական գործոնները՝ անտառային հրդեհները և հաճախակիացող երաշտները։ 1970-ականներից ի վեր միայն Հյուսիսային Ամերիկայում վերացել է շուրջ երեք միլիարդ թռչուն, իսկ առաջիկա 50 տարիներին վտանգված է ևս 389 տեսակ։

Ֆարնսուորթի խոսքով՝ թռչունները կարևոր դեր են խաղում վնասատուների դեմ պայքարում, բույսերի փոշոտման և սերմերի տարածման գործընթացներում։ Նրանց թվի նվազումը կարող է նվազեցնել գյուղատնտեսական բերքատվությունը և դեղագործական արդյունաբերության համար անհրաժեշտ բույսերի հասանելիությունը։