Mercedes-Benz-ի վաճառքը կտրուկ անկում է ապրել

Mercedes-Benz ավտոմեքենաների համաշխարհային վաճառքները 2025 թվականի երրորդ եռամսյակի արդյունքներով նվազել են 12 տոկոսով՝ համեմատած նախորդ տարվա նույն ժամանակահատվածի հետ։ Այս մասին հաղորդում է Reuters-ը։

«Չնայած Եվրոպայում, Հարավային Ամերիկայում և Պարսից ծոցի երկրներում վաճառքները լավ են ընթանում, սակայն Չինաստանի շուկայական իրավիճակը ազդել է մեր վաճառքների վրա երրորդ եռամսյակում», - հայտնել է ընկերության վարչության անդամ Մաթիաս Գայզենը։

Աշխարհի խոշորագույն ավտոշուկաներում՝ ԱՄՆ-ում և Չինաստանում, գերմանական արտադրողի վաճառքները նվազել են համապատասխանաբար 17 և 27 տոկոսով։ Mercedes-Benz-ը, ինչպես մի շարք այլ գերմանական ավտոընկերություններ, իջեցրել է 2025 թվականի գործունեության կանխատեսումները՝ ԱՄՆ նախագահ Դոնալդ Թրամփի կողմից սահմանված բարձրացված մաքսատուրքերի, ինչպես նաև Չինաստանում վաճառքների անկման հետևանքով, որը պայմանավորված է տեղական արտադրողների ուժեղ մրցակցությամբ։

Ավելի վաղ հայտնի էր դարձել, որ Jaguar Land Rover-ը չի կարողացել լիովին վերականգնել իր աշխատանքը կիբերհարձակման հետևանքներից հետո։