«Սա տարածք ազատելու ծրագիր է Եվրոպայի համար». Զախարովա

Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Ուկրաինայում մոբիլիզացիան անցկացվում է Եվրոպայի համար տարածք ազատելու նպատակով, գրում է Лента.ру-ն։

Զախարովայի խոսքով՝ արևմտյան հովանավորները վճարում են նախագահ Վլադիմիր Զելենսկուն, որպեսզի նա իրականացնի ուկրաինացիների ոչնչացումը։ «Սա Կենտրոնական Եվրոպայի հին գաղափար է, որը փորձարկվել էր 1930-40-ականներին՝ ուղղված արևելաեվրոպական տարածքներում, այդ թվում՝ Ուկրաինայում, սլավոնական բնակչության ոչնչացմանը», — ընդգծել է նա։

Զախարովան նաև նշել է, որ համացանցում տեղեկություններ են տարածվում Ուկրաինայի իշխանությունների՝ նոյեմբերի 1-ից սահմանները փակելու և համատարած մոբիլիզացիա հայտարարելու պատրաստակամության մասին՝ կանխատեսելով «մսաղացի» նոր ալիք։