Իրանից Հայաստան լոլիկի մածուկի ներմուծման լիցենզիայի համար ժամկետ սահմանվեց

Իրանից Հայաստան լոլիկի մածուկի սակագնային քվոտայով հատկացված 365 տոննա ծավալի համար ներմուծման լիցենզիայի գործողության ժամկետ սահմանվեց հոկտեմբերի 16-ից մինչև դեկտեմբերի 31-ը ներառյալ։ Համապատասխան որոշումն ընդունվել է ՀՀ կառավարության այսօրվա նիստին։

Կառավարությունը 2025 թ. օգոստոսի 28-ին որոշում է ընդունել, ըստ որի` 2025 թ. լոլիկի մթերումների գործընթացի կազմակերպման համար տոմատի մածուկի արտադրության նպատակով լոլիկի մթերումներ իրականացնող տնտեսավարող սուբյեկտներին 2000 տոննան գերազանցող մթերված լոլիկի յուրաքանչյուր 1 կգ դիմաց տրամադրվելու է 10 դրամի չափով սուբսիդավորում։

«Սուբսիդավորում տրամադրելու դեպքում տեղական արտադրության տոմատի մածուկի ինքնարժեքը կմոտենա ներմուծվողի մաքսային արժեքին, զգալիորեն կավելանա մրցունակության մակարդակը, որի արդյունքում լրացուցիչ կմթերվի շուրջ 7 հազար տոննա լոլիկ, կլուծվի ընթացիկ տարվա լոլիկի մթերումների կազմակերպման գործընթացում առկա խնդիրը, լրացուցիչ կարտադրվի շուրջ 1000 տոննա տոմատի մածուկ, որը գնային առումով մրցունակ կլինի ներմուծվող տոմատի մածուկի նկատմամբ և շուրջ 1000 տոննայով կնվազի տոմատի մածուկի ներմուծման ծավալը»,- ասված է որոշման հիմնավորման մեջ։