Պուտինը կոչ արեց լուծել Իրանի միջուկային հարցը միայն բանակցությունների միջոցով

Ռուսաստանի նախագահ Վլադիմիր Պուտինը հայտարարել է, որ Իրանի միջուկային ծրագրի շուրջ ստեղծված իրավիճակը պետք է կարգավորվի բացառապես բանակցությունների ճանապարհով․ «Այլընտրանք պարզապես չկա», — ընդգծել է նա «Ռուսաստան — Կենտրոնական Ասիա» գագաթնաժողովի ընթացքում, գրում է РИА Новости-ն։

Պուտինի խոսքով՝ Իրանը պատրաստակամ է փնտրել փոխընդունելի լուծումներ և վերականգնել համագործակցությունը ՄԱԳԱՏԷ-ի (Միջազգային ատոմային էներգիայի գործակալություն) հետ։ Նախագահը հիշեցրել է, որ Մոսկվա կատարած այցի ժամանակ կազմակերպության գլխավոր տնօրեն Ռաֆայել Գրոսսիի հետ մանրամասն քննարկվել է այս թեման։

«Մնում են տեխնիկական հարցեր, սակայն դրանց լուծումը կնպաստի այս բարդ տարածաշրջանային խնդրի վերջնական կարգավորմանը», — նշել է Պուտինը։ Ավելի վաղ ԱԳ նախարար Սերգեյ Լավրովը դատապարտել էր Արևմուտքի՝ Իրանի նկատմամբ պատժամիջոցների վերականգնումը՝ այն անվանելով միջազգային իրավունքի կոպիտ խախտում։