Էմմա Ուոթսոնը բացահայտեց՝ ումից է ստացել իր խորհրդավոր մատանին

Բրիտանացի դերասանուհի Էմմա Ուոթսոնը պարզաբանել է, որ մատանին, որը տեսել էին նրա անանուն մատին Փարիզի Նորաձևության շաբաթի ժամանակ, կապված չէ սիրային պատմության հետ։ Ինչպես պատմել է նա On Purpose փոդքասթում, զարդը իրեն նվիրել են ընկերները։

«Այն պատրաստված է 22 արծաթե թերթիկներից և ադամանդից։ Իմ 22 մտերիմ ընկերներն են գումար ներդրել, որպեսզի ինձ այդ մատանին նվիրեն։ Դա, թերևս, ամենաթանկ նվերն է, որ երբևէ ստացել եմ, որովհետև այն խորհրդանշում է կյանքը, որը ես կառուցել եմ՝ համայնքի, արմատների, հավատի և վստահության հիման վրա», — պատմել է Ուոթսոնը։

Դերասանուհին հավելել է, որ ամեն անգամ մատանուն նայելիս հիշում է իր ընկերներին։ «Ես սիրում եմ, որ այն ինձ հիշեցնում է բոլոր այն մարդկանց դեմքերը, ովքեր նվիրել են այն սիրով ու հավատով», — ասել է նա։