Աստղագետները հայտնաբերել են երիտասարդ «անհնազանդ» մոլորակ, որը կլանում է իր շրջակայքը

Աստղագետները հայտնաբերել են եզակի մոլորակային մարմին՝ Cha 1107-7626 անվանումով, որը գտնվում է Երկրից շուրջ 620 լուսատարի հեռավորության վրա և ունի Յուպիտերից 5-10 անգամ մեծ զանգված։ Այն չի պտտվում որևէ աստղի շուրջ՝ լինելով այսպես կոչված «անհնազանդ մոլորակ» (rogue planet)։ Գիտնականների խոսքով՝ այս մարմինը գտնվում է ձևավորման վերջին փուլում և կլանում է իր շուրջը եղած գազն ու փոշին՝ աննախադեպ արագությամբ։

Հետազոտությունը, որը հրապարակվել է The Astrophysical Journal Letters-ում, ցույց է տվել, որ Cha 1107-7626-ը մեկ վայրկյանում «ուտում» է մոտ վեց միլիարդ տոննա նյութ, ինչը համեմատելի է երիտասարդ աստղերի ձևավորման ամենաակտիվ փուլերի հետ։ Այս հայտնագործությունը վկայում է, որ աստղերի ձևավորման ֆիզիկական գործընթացները կարող են տեղի ունենալ նաև մոլորակային մասշտաբով։

Cha 1107-7626-ը, ըստ գիտնականների, մոտ մեկ-երկու միլիոն տարեկան է՝ չափազանց երիտասարդ՝ տիեզերական չափանիշներով։ Այն գտնվում է Կամալեոն համաստեղությունում և ձևավորվում է աստղի պես՝ գրավելով նյութեր իր շուրջից մագնիսական դաշտերի օգնությամբ։ Այսպիսի վարքագիծ նախկինում նկատվել էր միայն աստղերի մոտ։ Գիտնականները հույս ունեն, որ այս հայտնագործությունը կօգնի ավելի լավ հասկանալ, թե ինչպես են ծնվում և զարգանում ազատորեն լողացող մոլորակները տիեզերքում։