Սիրիական զորքերը Հալեպում ճնշում են ապստամբներին

Սիրիայի կառավարական զորքերը երկրի հյուսիսային մայրաքաղաք Հալեպի մատույցներում վերահսկողություն են հաստատում ապստամբ գրոհայինների նկատմամբ: Ինչպես հայտնում է ՍԱՆԱ տեղեկատվական գործակալությունը, վերջին ժամերին կառավարական զորքերը մի շարք հաջող մարտական գործողություններ են իրականացրել Քուվեյրասում, Մանաղում, Նեյրաբում, ուր կան ռազմական օդանավակայաններ: Գրոհայինների հարձակումները կասեցվել են, հակառակորդին զգալի վնաս է հասցվել, գրում է սիրիական գործակալությունը:

Երկրի հյուսիսում գործող Սիրիայի ազատ բանակն ու Ալ-Նուսրայի ճակատ խմբավորման զինված գրոհայինները հունվարին վերսկսել էին օդանավակայանների համար պայքարը՝ ձգտելով զրկել խոշոր քաղաքը պաշտպանող զորքերին օդային աջակցությունից:

Իդլիբ քաղաքում նրանք գրավել էին Թաֆթանազի ավիաբազան:

Ինչպես հաղորդում է Ալ-Վաթան տեղեկատվական գործակալությունը, գրոհայինների գործողությունները ղեկավարում են թուրք ռազմական խորհրդատուները: Օրինակ, Քուվեյրաս օդանավակայանի մոտ սիրիական զինծառայողները գերի են վերցրել մի խումբ թուրք սպաների: Նրանցից 4-ը օդաչուներ են: