«Պուտինը սպառնացել է»․ ինչ են պայմանավորվել ՌԴ և Ադրբեջանի նախագահները

Պուտինի հետ հանդիպման ժամանակ Ալիևը համաձայնվել է ազատ արձակել Ադրբեջանում ձերբակալված ռուսաստանցիներին՝ պայմանով, որ Ռուսաստանի անվտանգության ուժերը հրաժարվեն Աղալարովների և այլ անվանի ադրբեջանցիների նկատմամբ իրենց հավակնություններից։ Այս մասին հայտնել է INSIDER T-ն։

Նշվում է, որ ձերբակալված ռուսաստանցիների ճակատագիրը քննարկվել է Ռուսաստանի և Ադրբեջանի ղեկավարների՝ Դուշանբեում փակ դռների ետևում կայացած հանդիպման ժամանակ։ 

«Պուտինը հասկացրել է, որ մեր անվտանգության ուժերը պատրաստ են մեղմացնել ադրբեջանական սփյուռքի նկատմամբ իրենց վերահսկողությունը և դադարեցնել Ալիևի հետ մտերիմ հարաբերություններ ունեցող գործարարների թիրախավորումը: Սակայն դրա դիմաց պահանջվել է երկու բան: Մեկը՝ Բաքվի նախնական կալանքի կենտրոնում պահվող Ռուսաստանի քաղաքացիների ազատ արձակումն ու հայրենիք վերադարձն է, որոնք առանց որևէ հիմքի ձերբակալվել և կալանավորվել են: Եվ երկրորդը՝ Բաքվի կողմից Ուկրաինային որևէ ռազմական օգնություն ցուցաբերելուց պաշտոնապես հրաժարումը: Ալիևը համաձայնվել է երկու կետերին էլ, բայց երկար ժամանակ բազմաթիվ պայմաններ է առաջ քաշել: Պուտինը նույնիսկ սպառնացել է դադարեցնել հանդիպումը և ավարտել բանակցությունները: Դրանից հետո Իլհամ Հեյդարովիչը հանկարծ շատ ավելի զիջող է դարձել», - նշել են լրատվամիջոցի ինսայդերները: