Բեռնատար ամենագնացներ ԱԻՆ-ի համար

ՀՀ ԱԻՆ Պետական ռեզերվների գործակալությունն ԱԻՆ Փրկարար ծառայության տնօրինությանն է հանձնել 7 ամբողջովին նոր ամենագնաց բեռնատար ավտոմեքենա, ինչպես նաև 6 շարժական էլեկտրակայան։

Հունվարի 23-ին ԱԻ նախարար Արմեն Երիցյանն այցելեց ՓԾ Հատուկ փրկարարական ջոկատ, որտեղ Նախարարին ներկայացվեց Փրկարար ծառայությանը հանձնվող տեխնիկան։

Հայաստանի բոլոր մարզերում կան ճանապարհահատվածներ, որոնք ձմեռային ամիսներին դառնում են համարյա անանցանելի: Լինում են դեպքեր, երբ արձագանքումը պետք է իրականացվի բուսածածկ, անտառածածկ, լեռնային և զանազան պատճառներով դժվարամատչելի տարածքներում: Հիմնականում այս պատահարները տեղի են ունենում այն մարզերում, որտեղ ճանապարհներն անցնում են լեռնաշղթաներով և բարձրավանդակներով։ Դժվարամատչելի հատվածներում արձագանքման շատ դեպքերում անհրաժեշտություն է առաջանում ապահովել ավտոնոմ էներգամատակարարում:

Արտակարգ իրավիճակներում օպերատիվ և արդյունավետ արձագանքում ապահովելու նպատակով, Կառավարության որոշմամբ ՀՀ ԱԻՆ Պետական ռեզերվների գործակալության միջոցներից Փրկարար ծառայությանը հատկացվեց տարիներ շարունակ ռեզերվում պահված բոլորովին նոր թվով 7' 5 «ՈւՐԱԼ» և 2 «ԿԱՄԱԶ» մակնիշի բեռնատար ամենագնաց ավտոմեքենա և 6 շարժական էլեկտրակայան' 500, 400 և 30 կվտ հզորությամբ։ Նոր ամենագնաց մեքենաները հրշեջ-փրկարարներին հնարավորություն կտան հասնել դժվարամատչելի տարածքներ, ձնաբքերից և խցանումներից ավտոմեքենաներ դուրս բերել, անտառային և խոտածածկ տարածքներում հրդեհների ժամանակ բարձրադիր վայրեր տեղափոխել հրդեհաշիջում իրականացնողներին։

Նախարար Երիցյանը հանգամանալից ուսումնասիրեց նոր մեքենաներն ու շարժական էլեկտրակայանները, ծանոթացավ դրանց տեխնիկական հնարավորություններին։

Արտակարգ իրավիճակների նախարարը նաև հանդիպեց ՓԾ Հատուկ փրկարարական ջոկատի անձնակազմին։ Արմեն Երիցյանը նշեց, որ 2012 թ. ՀՓՋ-ին հատուկ ուշադրություն է դարձվելու, միջոցներ են փնտրվելու նրանց տեխնիկական ու ֆինանսական ապահովվածությունը բարելավելու համար։

Փրկարար ծառայությունում պայթեցնողների և սակրավորների խմբեր ձևավորելու նպատակով ՀՓՋ մի շարք փրկարարներ համապատասխան դասընթացներ են անցնում Պաշտպանության նախարարությունում։ Այսօր նախարար Երիցյանը վկայականներ հանձնեց պայթեցման աշխատանքների իրականացման դասընթացները հաջողությամբ ավարտած 6 փրկարարի։