Թուրքիան չի «խնամում» Սուրբ Արարատը (տեսանյութ)

Առաջին շոկը՝ երբ իմացա, որ Արարատ վերելքը երեք օր է տևում։

Մինչ այդ՝  ոգևորված դեմքերով, հայկական դրոշներով լուսանկարներ նայելիս չէի մտածել այդ մասին։ Հետո հանկարծ հասկացա, որ երեք օր ոչ ոք չի կարող դիմանալ առանց «զուգարան գնալու» ու այդ վերելքի սիրունությունը կորավ։

Փաստորեն՝ Արարատի գագաթին հայտնվելու համար երեք օր ամեն մեկը Արարատը դարձնում է նաև արտաքնոց։

Հետո մխիթարեցի ինձ, որ՝ բնությունը կմաքրի։ Երևի։

Բայց օրերս տեսա թաթար լեռնագնաց Բուլատ Զակիրովի տեսանյութը Արարատից, պարզվում է ավելին՝ Արարատը վերածվում է աղբավայրի։  Ջորիները դատարկ իջնում են, բայց աղբը իրենց հետ չեն իջեցնում՝ մի շոկի մեջ էլ լեռնագնացն է։ 

- Ավելի կեղտոտ է, քան Նեպալում,-ասում է Զակիրովը։

Թուրքիան իրեն պատռում է Հայաստանին արգելելու Արարատ կրելուց, բայց իրականում չի էլ գնահատում, թե Արարատը հիմա որտեղ է։ Արարատը եղել է ու կլինի հայերիս Հայրենիքի հզորագույն հուշակոթողը, ու եթե մեր աչքի առաջ հիշեցնում է Հայրենիքի կորուստ, ապա թուրքերին հիշեցնելու է և որ իրենք օտար-եկվոր են այդ հողում, և՝ որ Հայոց ցեղասպանությունն անգամ նրանց չտվեց ու հարազատ չդարձրեց այդ հողը։

Գուցե այդ քոչվոր հոգին է, որ այդքան անկուշտ է դարձնում Թուրքիային, ստիպում տարածվելու մինչև իր ծննդավայր, բա թե՝ մեծ թուրան-բան-ման։

Նույնը Արցախի մասով է։ Ինչքան էլ ալիևն ու ադրբեջանը հիանան իրենց հաղթանակով, նրանք չեն սիրելու Արցախը, ինչքան էլ ցուցադրաբար գնան, շինեն, քանդեն՝ նույնիսկ այսօրվա դատարկ Արցախը որպես Արարատ կանգնած է կոկորդներին։

Հա, ու այստեղ չասեք՝ բա մենք, բա որ, կամ՝ մարդը մարդուն չի խնամում, Թուրքիան պիտի Սուրբ Արարա՞տ խնամի։

Դրանք իրար հակադարձ չեն, դրանք իրարից կախված են։

Անահիտ Ոսկանյան