ՌԴ ֆինանսների նախարարը խոստովանել է՝ տնտեսության «սառեցումը» դառնում է բարդ գործընթաց

Ռուսաստանի ֆինանսների նախարար Անտոն Սիլուանովը հայտարարել է, որ երկրի տնտեսության «պլանային սառեցումը»՝ անցած տարվա գերտաքացումից հետո, բարդ, բայց անհրաժեշտ քայլ է։ Դումայի բյուջետային և հարկային կոմիտեի առաջ ունեցած ելույթում Սիլուանովը նշել է, որ քաղաքականությունը միտված է տոկոսադրույքների նվազեցմանը և տնտեսական աճի որակի բարելավմանը։

Նրա խոսքով՝ նման մոտեցումը պետք է օգնի ստեղծել լրացուցիչ ֆինանսական ռեսուրսներ և բարձրացնել քաղաքացիների իրական եկամուտների մակարդակը։ Սակայն փորձագետների գնահատմամբ՝ այս «սառեցումը» կարող է բերել տնտեսության գրեթե զրոյական աճի։ Վերլուծական կենտրոնները զգուշացնում են, որ երկիրը կանգնած է ռեցեսիայի վտանգի առաջ՝ պայմանավորված արևմտյան պատժամիջոցներով, վճարային սահմանափակումներով և աշխատուժի պակասով։

Տնտեսագետ Սոֆյա Դոնեցը կանխատեսում է, որ Ռուսաստանի տնտեսությունը իր ամենացածր կետին կհասնի 2025 թվականի երկրորդ կեսին և միայն հաջորդ տարվա վերջին կսկսի վերականգնումը։