ԱՄՆ-ն դատի է տվել Samsung-ին 446 միլիոն դոլարի պահանջով՝ արտոնագրերի խախտման համար

Տեխասում (ԱՄՆ) երդվյալ ատենակալների դատարանը հարավկորեական Samsung Electronics կորպորացիային մեղավոր է ճանաչել ամերիկյան Collision Communications ընկերությանը պատկանող մտավոր սեփականության ապօրինի օգտագործման համար։ Դատավարությունը, որը սկսվել էր դեռ 2023 թվականին, ավարտվել է նրանով, որ Samsung-ը պարտավոր է վճարել 445.5 միլիոն դոլար փոխհատուցում։ Այս մասին հայտնում է Reuters-ը։

Գործը վերաբերում էր Collision ընկերության չորս արտոնագրերի խախտմանը, որոնք առնչվում էին չորրորդ և հինգերորդ սերնդի (4G, 5G) կապի ստանդարտների և Wi-Fi տեխնոլոգիաների հետ։ Երդվյալ ատենակալները գտել են, որ Samsung-ի մի շարք սարքեր՝ ներառյալ սմարթֆոններն ու անլար կապ ապահովող նոթբուքերը, խախտում են հայցվորի արտոնագրային իրավունքները։

Ավելի վաղ տեխնոլոգիական հսկան հերքել էր մեղադրանքները՝ պնդելով, թե Collision ընկերության արտոնագրերը անվավեր են։ Դատական հայցում նշվում էր, որ համապատասխան մտավոր սեփականությունն ստեղծվել է BAE Systems ռազմական կորպորացիայի հետազոտությունների հիման վրա, սակայն վերջինս չի մասնակցել դատական գործընթացին։

Այս վճիռը կայացվել է այն բանից հետո, երբ Samsung-ին հաջողվել էր խուսափել մեկ այլ արտոնագրային ընկերության՝ Headwater-ի հետ հետագա վեճերից։ Անցած ամիս կողմերը դատից դուրս պայմանավորվածություն էին ձեռք բերել տվյալների փոխանցման օպտիմալացման արտոնագրային խախտումների վերաբերյալ, ինչից հետո Headwater-ը հետ էր վերցրել իր պահանջները։

Թարգմանությունը՝ Lurer.com-ի