Հոլիվուդի լեգենդ Դայան Քիթոնը մահացել է 79 տարեկանում

79 տարեկան հասակում մահացել է ամերիկյան կինոյի ամենանշանավոր դերասանուհիներից մեկը՝ Դայան Քիթոնը, որը հայտնի էր «Անի Հոլ» և «Կնքահայր» ֆիլմերով։ Նրա մահը հաստատել է Rizzoli հրատարակչությունը՝ նշելով, որ Քիթոնը «մշակութային խորհրդանիշ էր, որի ազդեցությունը տարածվում էր կինոյից մինչև նորաձևություն և դիզայն»։

Քիթոնը նկարահանվել է ավելի քան 60 ֆիլմում՝ սկսած «Կնքահայր» եռագրությունից մինչև «The First Wives Club» և «Something’s Gotta Give»։ Նա արժանացել էր «Օսկար»-ի՝ «Անի Հոլ» ֆիլմում Վուդի Ալենի հետ իր անմոռանալի դերակատարման համար։ Դերասանուհին հայտնի էր իր անդրոգեն ոճով՝ երկար բաճկոններով, գլխարկներով և բարձր պարանոցով սվիտերներով, որոնք դարձան նրա այցեքարտը։

Բացի դերասանական կարիերայից՝ Քիթոնը եղել է նաև ռեժիսոր, պրոդյուսեր և գրող։ Իր երկու հուշագրերում՝ Then Again (2011) և Let’s Just Say It Wasn’t Pretty (2014), նա բացահայտել էր կյանքի դժվար փուլերն ու պայքարը բուլիմիայի դեմ։ Չնայած բարձրաձայնած սիրավեպերին Վուդի Ալենի, Ուորեն Բիթիի և Ալ Պաչինոյի հետ՝ Քիթոնը երբեք չէր ամուսնացել։ Նա 50 տարեկանում որդեգրել էր երկու երեխա՝ Դեքսթերին և Դյուկին, որոնց մասին ասել էր. «Նրանք փոխեցին իմ ամբողջ աշխարհընկալումը։ Նրանք իսկական հրաշքներ են»։