Հարավային Կորեան միջուկային բունկեր կկառուցի ԿԺԴՀ-ի և Ռուսաստանի սպառնալիքի պատճառով․ KH

Սեուլի իշխանությունները մտադիր են մինչև 2028 թվականը կառուցել առաջին քաղաքացիական միջուկային ապաստարաները, այս մասին հաղորդել Է The Korea Herald թերթը։ Նախագիծը կդառնա բնակչության անվտանգության ուժեղացմանն ուղղված միջոցառումների մի մասը՝ կապված ԿԺԴՀ-ի կողմից աճող ռազմական սպառնալիքների և գլոբալ անկայունության, այդ թվում՝ Ուկրաինայի դեմ Ռուսաստանի շարունակվող պատերազմի հետ:

Ըստ հասանելի տեղեկությունների՝ ստորգետնյա ապաստարանը կտեղակայվի Սեուլի բնակելի համալիրի երրորդ ստորգետնյա հարկում և նախատեսված կլինի արտաքին միջուկային, կենսաբանական կամ քիմիական սպառնալիքներից պաշտպանվելու համար: Ապաստարանը հագեցած կլինի օդափոխության, ջրամատակարարման և կոյուղու համակարգերով։ Ապաստարանը կզբաղեցնի 2 147 քառակուսի մետր տարածք և կարող է տեղավորել մինչև 1 020 մարդու, որոնք կարող են այնտեղ մնալ երկու շաբաթ:

Խաղաղ ժամանակ ապաստարանը լինելու է հանրային ֆիթնես կենտրոն։ Թերթն ընդգծել է, որ սա «քաղաքացիական անձանց համար միջուկային հարվածից պաշտպանությամբ առաջին ապաստարանն է, որը տարածաշրջանային իշխանություններն ինքնուրույն կկառուցեն»: Շինարարությունը նախատեսվում է ավարտել 2028 թվականին, այս պահին 16 շենքերից բաղկացած բնակելի համալիրի նախագծումն ավարտվել է 70%-ով։