Ցեղասպանությունների ժխտումը Ֆրանսիայում արդեն քրեորեն պատժելի է

Մոտ 8 ժամ տևած քննարկումների արդյունքում Ֆրանսիայի Սենատն ի վերջո որոշում կայացրեց ցեղասպանությունների ժխտումը քրեականացնող օրինագծի վերաբերյալ։ Քվեարկությանը մասնակցած 213 սենատորից 107-ը քվեարկեց կողմ, 86 -ը՝ դեմ՝ այսպիսով հաստատելով ցեղասպանություների ժխտումը քրեականացնող օրինագիծը։

Սենատում քննարկման ժամանակ առաջարկվեց օրինագծում կատարել 4 փոփոխություն, որոնք հերթով քննարկվեցին և առանձին-առանձին քվեարկության դրվեցին։ Քվեարկության արդյունքում օրինագիծը մնաց անփոփոխ։ Ինչպես հաղորդեց  ՀՅԴ Հայ Դատի Փարիզի գրասենյակի տնօրեն Հրաչ Վարժապետյանը, այդ փոփոխությունները միայն բառային մակարդակում էին, որևէ լուրջ բովանդակային փոփոխություն չէր առաջարկվել։

Նշենք, որ բուն օրինագծի քննարկման ժամանակ կողմ և դեմ ելույթների մեջ գրեթե ոչինչ չփոխվեց։ Ելույթ ունեցող սենատորները կրկնեցին նույն մոտեցումներն ու մտքերը, որ արտահայտել էին առաջին փուլում։

Փոփոխությունները քննարկելուց և քվեարկության դնելուց հետո Սենատի բավական մեծ թվով անդամներ կրկին խոսեցին իրենց տեսակետների մասին, ապա Սենատն անցավ արդեն բուն օրինագծի քվեարկությանը։ 

Օրինագիծը հաստատվեց, սակայն որպեսզի այն օրենքի ուժ ստանա, պետք է Ֆրանսիայի նախագահ Նիկոլա Սարկոզիի ստորագրությունը, իսկ դա կասկած չի հարուցում՝ ելնելով նրա իսկ ելույթներից։

Կարող ենք ասել, որ Հայոց ցեղասպանությունը Ֆրանսիայի տարածքում ժխտելու ցանկացած փորձի քրեորեն պատժելիությունն արդեն իրողություն է։