Ինչ քննարկում է սպասվում Թրամփին և Զելենսկուն հոկտեմբերի 17-ին․ Axios

ԱՄՆ և Ուկրաինայի նախագահներ Դոնալդ Թրամփը և Վոլոդիմիր Զելենսկին հոկտեմբերի 17-ին կքննարկեն հակաօդային պաշտպանության և սպառազինության հարցերը, այդ թվում՝ Tomahawk-ի մատակարարման հնարավորությունը։ Այս մասին հաղորդում Է Axios պարբերականը:

Հաղորդվում է՝ նախագահ Զելենսկին հաստատել է, որ Թրամփի հետ կհանդիպի հոկտեմբերի 17-ին, ինչպես նաև հանդիպումներ է պլանավորել սենատորների, կոնգրեսականների, զինվորականների, էներգետիկ ընկերությունների և «այլ կարևոր անձանց» հետ:

«Ուկրաինայի առաջնորդի ԱՄՆ այցի գլխավոր թեմաներն են հակաօդային պաշտպանությունը և Ռուսաստանին հեռահար հարվածների համար նախատեսված զենքը», - ասվում է նյութում:

Ավելի վաղ առաջնորդների հնարավոր հանդիպման մասին հայտնել էին Financial Times-ի լրագրող Քրիստոֆեր Միլլերի և Axios-ի լրագրող Բարաք Ռավիդի աղբյուրները: Այն կարող է դառնալ այս տարվա ընթացքում Վաշինգտոնում տեղի ունեցած երրորդ այցը։