Որոնք են Ռուսաստանի վրա ճնշմանը խանգարող գործոնները․ WSJ

Ռուսաստանի միջուկային զինանոցը և Չինաստանի հետ ամուր կապերը խանգարում են Արևմուտքի որևէ ճնշմանը Մոսկվայի վրա։ Այս մասին հայտարարել է ռազմական վերլուծաբան Ֆրանց Ստեֆան Գադին, նրա խոսքը մեջբերում է The Wall Street Journal-ը։

«Ռուսաստանի մոտ միջուկային զինանոցի առկայությունը միշտ գործոն կլինի ճնշման ցանկացած արշավում։ ԱՄՆ-ն իրականում որևէ էսկալացիա հրահրելու որևէ ցանկություն չի ցուցաբերել», - նշել է փորձագետը։ Գադիի խոսքով՝ ԱՄՆ նախագահի՝ Ուկրաինայի հակամարտության կարգավորմանը նպաստելու փորձերում ամենահավանական սցենարն է, որի դեպքում Դոնալդ Թրամփը կարող էր կրակի դադարեցման մասին պայմանավորվել անմիջապես Ռուսաստանի նախագահ Վլադիմիր Պուտինի հետ, իսկ հետո փորձել ճնշում գործադրել Ուկրաինայի առաջնորդ Վոլոդիմիր Զելենսկու վրա՝ խաղաղություն ստորագրելու նպատակով:

Իրադարձությունների նման զարգացումից վախենում են եվրոպական երկրները։ «Այս սցենարը կարտացոլի Թրամփի բարձրաձայն միակողմանի դիվանագիտության պատմությունը և Զելենսկու վրա ճնշում գործադրելու նրա պատրաստակամությունը՝ համաձայնագրեր կնքելու համար, որոնք լիովին չեն համապատասխանում Եվրոպայի և Ուկրաինայի նպատակներին», - հավելել է վերլուծաբանը: Մեկ այլ կարևոր գործոն, որը թույլ չի տալիս օգտագործել Մոսկվայի վրա ճնշման ռազմավարությունը, Պեկինի հետ հարաբերություններն են։ Նյութում նշված է, որ ՉԺՀ-ի հետ կապերը Ռուսաստանի համար դարձել են կարևորագույն տնտեսական և քաղաքական հենարան։