Պանտալեո Դելլ'Օրկոն նշանակվել է «Giorgio Armani» հիմնադրամի նախագահ

Giorgio Armani-ի մահից հետո նրա երկարամյա գործարար և անձնական գործընկեր Պանտալեո Դելլ'Օրկոն նշանակվել է դիզայների անունը կրող հիմնադրամի նոր նախագահ։ Հիմնադրամը ստեղծվել է 2016 թվականին և հանդիսանում է Արմանիի իրավահաջորդության ծրագրի առանցքային մասնիկը, հայտնում է Reuters-ը։

Հիմնադրամի խորհրդում ընդգրկված են ևս չորս անդամ՝ Irving Bellotti (Rothschild բանկ), Անդրեա Կամերանա (Արմանիի եղբորորդի), նոտարիուս Էլենա Տերենգի և փաստաբան Անդրեա Սիլվեստրի։ Արմանին, որը մահացավ սեպտեմբերի 4-ին՝ 91 տարեկանում, մինչև այդ անձամբ էր ղեկավարում հիմնադրամը, որն ունի ընկերության քվեարկության իրավունքների շուրջ 30 տոկոսը։

Հիմնադրամը առաջիկայում կներկայացնի նոր գլխավոր տնօրենի թեկնածությունը։ Արմանիի կտակի համաձայն՝ ժառանգները պետք է վաճառեն ընկերության 15 տոկոս բաժնետոմսերը՝ առաջնահերթ առաջարկելով այն LVMH, L’Oréal կամ EssilorLuxottica կոնգլոմերատներին, կամ այլ համարժեք շքեղ բրենդների խմբերին՝ հիմնադրամի և Դելլ'Օրկոյի համաձայնությամբ։