Ռյուտտեն կատակով է մեկնաբանել ՆԱՏՕ-ի ռազմական մատակարարումները

ՆԱՏՕ-ի գլխավոր քարտուղար Մարկ Ռյուտտեն հումորով է արձագանքել եվրոպական երկրներին F-35 կործանիչների և Patriot հակաօդային պաշտպանության համակարգերի մատակարարման թեմային՝ պատմելով հին ռուսական անեկդոտ «Lada»-ի և սառնարանի մասին, գրում է Clash Report-ը։

Ռյուտտեն ընդգծել է, որ եվրոպական և ամերիկյան պաշտպանական ընկերությունների արտադրանքի նկատմամբ պահանջարկը զգալիորեն աճել է, և անհրաժեշտ է արագացնել արտադրության տեմպերը։ Նա հավելել է, որ իրավիճակը հիշեցնում է հայտնի կատակն այն մասին, թե ինչպես «Lada»-ի վաճառողը խոստանում է մեքենան մատակարարել տասը տարի անց, իսկ գնորդը հարցնում է՝ «առավոտվա՞ն, թե՞ կեսօրին», քանի որ կեսօրին պետք է բերեն սառնարանը։

Գլխավոր քարտուղարը նշել է, որ այս պատմությունը հարմար համեմատություն է՝ ցույց տալու, թե որքան դանդաղ են ընթանում ռազմական արտադրանքի մատակարարումները ներկայում։ Ավելի վաղ Ռյուտտեն հայտարարել էր, որ ՆԱՏՕ-ի օդային տարածքում ռուսական ինքնաթիռներ խոցելը սխալ կլինի, և անհրաժեշտ է «համաչափ, բայց զուսպ արձագանք»։