Մադագասկարի խորհրդարանը քվեարկել է նախագահի պաշտոնանկության օգտին

Մադագասկարի Ազգային ժողովը՝ երկրի ստորին պալատը, քվեարկել է նախագահ Անդրի Ռաձուելինայի պաշտոնանկության օգտին։ Այդ մասին հայտնում է ТАСС-ը՝ վկայակոչելով տեղական աղբյուրները։

Նույն օրը՝ հոկտեմբերի 14-ին, Ռաձուելինան հայտարարել է, որ իր հերթին լուծարել է Ազգային ժողովը՝ հղում անելով Սահմանադրության 60-րդ հոդվածին։ Նախագահի հրամանագրում նշված է, որ այդ որոշումը կայացվել է «քաղաքական կայունության վերականգնման նպատակով»։

Մադագասկարի քաղաքական ճգնաժամը սրվել է վերջին օրերին։ Նախագահը հոկտեմբերի 13-ին լքել էր երկիրը, հայտարարելով, որ դա արվել է անվտանգության նկատառումներից ելնելով։ Մի քանի օր առաջ նախագահի վարչակազմը հայտարարել էր, որ երկրում ընթանում է պետական հեղաշրջման փորձ, իսկ Ռաձուելինան կոչ էր արել քաղաքական ուժերին պաշտպանել սահմանադրական կարգն ու ազգային ինքնիշխանությունը։