Գյումրեցի տանկիստ Տիգրան Աբգարյանն այսօր կդառնար 29 տարեկան (լուսանկարներ)

 

«Դուք ապրեք, որ ես էլ ապրիմ... ծնվողները, մեռնողներից պտի շատ էղնին»․ գյումրեցի տանկիստ Տիգրան Աբգարյանի խոսքերն են, ով հերոսաբար զոհվել է ապրիլյան քառօրյա պատերազմի ժամանակ` Ջաբրայիլում։

2016 թ. ապրիլի 1-ի գիշերը, լույս 2-ի առավոտյան՝ ժամը 02:30-03:00-ից սկսած, Ադրբեջանը բացահայտ լայնածավալ հարձակում ձեռնարկեց Արցախի ուղղությամբ՝ մեծաքանակ ուժերով հարձակվելով հատկապես 6-րդ պաշտպանական շրջանի (Մատաղիս) և 9-րդ պաշտպանական շրջանի (Ջեբրայիլ) առանձին մարտական դիրքերի ուղղությամբ։

 

Տիգրան Աբգարյանն այդ ժամանակ հերթապահության է եղել անցակետում, ու գիշերով հանկարծ նկատել է, որ թշնամին սկսել է իրենց կողմ արկեր թողնել, ընկերների հետ է եղել, երեքն էլ հասկացել են, որ պատերազմ է սկսվում: Տիգրանը վազելով տանկի հետևից գոռացել է՝ «Մենակ, թե չասեն, որ տանկը դանդաղ վարեմ»:

 

Ապա շատ մեծ արագությամբ հասել են Ջեբրայիլ՝ արդեն գրաված դիրքերը հետ գրավելու նպատակով: Տիգրանը եւ նրա մարտական ընկերները՝ Մոնթե Եղոյան (Բենիամին), Վլադիմիր Ալիխանյանը խոցել են՝ 3 տանկ 1 BMP, ոչնչացրել 10 ադրբեջանական դիրք, գրավել կարեւոր նշանակության դիրքեր, վերցրել ադրբեջանական դրոշը եւ գցել տանկի տակ (Մոնթեի օրինակով)։ Հարազատները Տիգրանի մահվան բոթն իմացել են ապրիլի 7-ին։ Գյումրեցի տանկիստ Տիգրան Աբգարյանին հետմահու պարգևատրվել է «Մարտական ծառայություն» մեդալով, «Մարտական խաչ» առաջին աստիճանի շքանշանով։

 

Տանկիստ Տիգրան Աբգարյանն այսօր կդառնար 29 տարեկան։

 

Արցունքներ, հուզմունք և ափսոսանքի խոսքեր են հնչում գյումրեցի տանկիստ Տիգրան Աբգարյանի մասին խոսելիս։ Կյանքով լեցուն, բարի, գաղտնապահ, համառ, կարգապահ, մարդկային․ ահա այսպես են հերոս Տիգրանին բնութագրում հարևանները, հարազատներն ու Տիգրանին ճանաչողները։ Օրը Տիգրանինն է. նրա ապրած ու չապրած տարիների մասին։