ԲՐԻԿՍ-ի անդամ Հնդկաստանը պայմանականորեն բացում է նավթային շուկան ԱՄՆ-ի առաջ

Հնդկաստանը, որը անդամ է ԲՐԻԿՍ միավորման, պատրաստ է երկու անգամ ավելացնել էներգակիրների ներմուծումը ԱՄՆ-ից, եթե Վաշինգտոնը առաջարկի մրցունակ գներ, հայտարարել է երկրի առևտրի փոխնախարար Ռաջեշ Ագրավալը, գրում է ՏԱՍՍ-ը։

Ըստ պաշտոնյայի՝ Նյու Դելին դիտարկում է ամերիկյան էներգառեսուրսների ներմուծման մեծացումը՝ ներմուծման աղբյուրների դիվերսիֆիկացիայի նպատակով։ Սա նաև կարող է օգնել նվազեցնել առևտրային դեֆիցիտը ԱՄՆ-ի հետ և նոր թափ հաղորդել երկկողմ առևտրային բանակցություններին։ «Մենք կարող ենք մոտ 12-15 միլիարդ դոլարի չափով ավելացնել գնումները՝ առանց վերամշակման գործարանների փոփոխության։ Հիմնական պայմանը՝ գինը պետք է լինի ողջամիտ», — նշել է նա։

Ավելի վաղ Economic Times-ը գրել էր, որ Հնդկաստանի նավթավերամշակող ընկերությունները առաջիկա ամիսներին կշարունակեն մեծացնել ռուսական նավթի ներմուծումը, քանի որ ԱՄՆ-ի հետ բանակցություններում առաջընթաց չկա։ Աշնանը Վաշինգտոնը մտցրել էր 50 տոկոսային մաքսատուրքեր հնդկական ապրանքների վրա՝ փորձելով ստիպել Նյու Դելիին դադարեցնել ռուսական նավթի գնումները, սակայն Հնդկաստանը հայտարարել էր, որ իր գործարքները պայմանավորված են միայն գներով և շարունակվելու են։