Բողոքի ակցիա՝ կառավարության դիմաց (տեսանյութ)

Բեռնատարների վարորդները բողոքի ակցիա են անում կառավարության դիմաց. նրանք պահանջում են, որ ՀՀ իշխանությունները բանակցեն իրենց ռուս գործընկերների հետ, որպեսզի վերջիններս հանեն օտարերկրյա քաղաքացիների համար սահմանված 90-օրյա արգելքը:

Էկոնոմիկայի նախարար Գևորգ Պապոյանը վարորդներին հայտնեց, որ զբաղվում է նրանց խնդրով․ «Սրանից ավելին էս պահին բան չասեմ, բայց ձեզնից շատ ենք զբաղվում։ Աշխատանքային մի երկու բան, որ ասեմ, մեր ու ձեր գործին կարող է խանգարել։ Բայց, հավատացեք, ամենաբարձր մակարդակով՝ ԵԱՏՄ-ում զբաղվում ենք էս հարցով»,– ասաց նախարարը՝ նշելով, որ ինքն էլ գիտի՝ 90-օրյա ժամկետով սահմանափակումը բավարար չէ, որովհետև այդ օրերի մեծ մասը վարորդները կարող է միայն Լարսում անցկացնեն։

Վարորդներն էլ իրենց հերթին լրագրողների հետ զրույցում հայտարարեցին, որ եթե իրենց խնդիրը չլուծվի, բեռնատարներով ճանապարհներ են փակելու։

Նշենք, որ այս տարվա հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով (այսինքն՝ միգրացիոն քարտում «այցի նպատակը» բաժնում աշխատանքը նշված չէ- խմբ․), օրացույցային տարվա ընթացքում կարող են մնալ 90 օր (նախկինում թույլատրելի էր տարվա յուրաքանչյուր 180 օրվա մեջ 90 օր- խմբ․)։