Ի պատասխան Tomahawk-ի հարվածների՝ Ռուսաստանը ստիպված կլինի հարվածել ԱՄՆ-ի տարածքին. Ժուրավլյով

Ի պատասխան Tomahawk հրթիռների հարվածների, եթե այդպիսիք փոխանցվեն Կիևին, Ռուսաստանը ստիպված կլինի հարվածներ հասցնել ԱՄՆ ինքնիշխան տարածքին: Այս մասին հայտարարել է Պետդումայի պաշտպանության կոմիտեի նախագահի առաջին տեղակալ Ալեքսեյ Ժուրավլյովը, փոխանցում է EADaily-ն։

«Կողմերից մեկի զենքի նոր մատակարարումները խորացնում են հակամարտությունը։ Այժմ խոսքը Tomahawk հրթիռների մասին է, որոնք կարող են հագեցած լինել միջուկային մարտագլխիկներով, և թռիչքի ժամանակ ոչ ոք չի կարող որոշել՝ այն նման լիցք կրում է, թե ոչ։ Բացի այդ, եթե նման հրթիռներ հայտնվեն Ուկրաինայի Զինված ուժերի մոտ, դրանցով ռուսական տարածքի վրա կկրակեն ամերիկացի զինվորականները։ Ռազմական գործողություններին անմիջական մասնակցությունը նույնն է, ինչ մեր հրթիռակիրները կրակ բացեին ԱՄՆ-ի վրա Կուբայի, Վենեսուելայի կամ Մեքսիկայի տարածքից», - հայտնել է նախագահի առաջին տեղակալը։

Եթե Tomahawk-ը ոչնչացնի ռուսական քաղաքները, Ռուսաստանը ստիպված կլինի պատասխան հարվածներ հասցնել ԱՄՆ ինքնիշխան տարածքին, նրա նավերին կամ ռազմական բազաներին: «Ոչ ոք այդ հանգամանքի վրա աչք չի փակի», - վստահեցրել է պատգամավորը: