Nestlé-ն կրճատում է 16 հազար աշխատատեղ՝ նոր գլխավոր տնօրենի «վերածննդի ծրագրի» շրջանակում

Շվեյցարական սննդարդյունաբերական հսկան՝ Nestlé-ն, հայտարարել է 16 հազար աշխատատեղի կրճատման մասին, ինչը կազմում է ընկերության աշխատակազմի շուրջ 5.8 տոկոսը։ Նոր գլխավոր տնօրեն Ֆիլիպ Նավրատիլը հայտնել է, որ քայլը միտված է ծախսերի կրճատմանը և ներդրողների վստահության վերականգնմանը։ Ընկերությունը բարձրացրել է իր խնայողությունների նպատակը՝ հասցնելով այն մինչև 3 միլիարդ շվեյցարական ֆրանկի 2027-ի վերջում, նախնական 2.5 միլիարդի փոխարեն, հայտնում է Reuters-ը։

Նավրատիլի պաշտոնավարման մեկնարկը համընկել է Nestlé-ում աննախադեպ կառավարչական ճգնաժամի հետ։ Նախորդ գլխավոր տնօրեն Լորան Ֆրեյքսեն ազատվել էր պաշտոնից ներքին սկանդալի պատճառով, իսկ խորհրդի նախագահ Փոլ Բուլկեն վաղաժամ հեռացավ՝ տեղը զիջելով նախկին Inditex-ի ղեկավար Պաբլո Իսլային։ Նավրատիլը հայտարարել է, որ մոտ 12 հազար գրասենյակային աշխատակիցների և ևս 4 հազար արտադրական աշխատողների կրճատումը մաս է կազմում արդյունավետության բարձրացման ծրագրի։

Nestlé-ի վաճառքները երրորդ եռամսյակում աճել են 4.3 տոկոսով, գերազանցելով կանխատեսումները։ Մասնավորապես, աճը պայմանավորված է սուրճի և քաղցրավենիքի գների բարձրացմամբ։ Նավրատիլը հայտարարել է, որ իր գլխավոր նպատակը Nestlé-ում «արդյունավետության և հաղթանակի մշակույթ» ձևավորելն է։ Ընկերությունը պահպանել է իր 2025 թվականի կանխատեսումները՝ սպասելով առնվազն 16 տոկոս շահութաբերության ցուցանիշի և նախատեսելով, որ հիմնական խնայողությունները կիրականացվեն 2026–2027 թվականներին։