«Հայկական ժամանակ». ևս 400 հոգի դո՞ւրս են եկել ԲՀԿ–ից

Թերթը գրում է. «ԲՀԿ Արարատի կառույցից դուրս են եկել ևս մոտ 400 հոգի: Այս մասին մեզ տեղեկացրեց Կարեն Խաչատրյանը, որը նախորդ շաբաթ դուրս էր եկել ԲՀԿ-ից, ինչպես նաև հրաժարվել էր ԲՀԿ Արարատի կառույցի ղեկավարումներից ու Արարատի փոխքաղաքապետի պաշտոնից: «Իմ իմանալով՝ արդեն մոտ 400-ն անցել է դուրս եկողների թիվը. ես չեմ էլ զբաղվում այդ հարցով, ուղղակի ինձ գալիս ասում են՝ դուրս եկանք, ասում եմ՝ դուք գիտեք, ձեր կարծիքն ունեք, հարմար եք գտնում՝ դուրս եկեք, չէ՝ չէ», - ասաց Խաչատրյանը՝ հավելելով, որ թե այդ 400-ը իր համախոհներն են, իր քաղաքի բնակիչները: Խաչատրյանի խոսքով, դուրս չեն գալիս միայն նրանք, ովքեր աշխատում են Արարատի ցեմենտի գործարանում (պատկանում է ԲՀԿ նախագահ Գագիկ Ծառուկյանին): Արարատի մարզի ԲՀԿ կառույցի ղեկավար Տիգրան Ստեփանյանը մեզ հետ զրույցում հերքեց, որ 400 հոգի դուրս է եկել Արարատ քաղաքի ԲՀԿ կառույցից: «Դիմում են ներկայացրել 11 հոգի, որից երկուսը նոյեմբեր ամսին՝ այլ աշխատանքի անցնելու կապակցությամբ: Մնացած 9-ից 3-ը Կարեն Խաչատրյանի ընկերներն են, 9-ը՝ բարեկամները, այլ դիմումներ մենք չունենք», - ասաց Ստեփանյանը»: