Պուտինն ու Թրամփը կդիմավորեն միմյանց ՆԱՏՕ-ի երկրում․ ինչու ընտրվեց հենց Հունգարիան

Ռուսաստանի և ԱՄՆ-ի նախագահներ Վլադիմիր Պուտինի ու Դոնալդ Թրամփի սպասվող հանդիպման վայրը՝ Բուդապեշտը, առաջացրել է աշխույժ քննարկումներ։ Չնայած Հունգարիան ՆԱՏՕ-ի և ԵՄ-ի անդամ է, այն համարվում է առավել բարեկամական Ռուսաստանին և առանձնանում է անկախ դիրքորոշմամբ։ Ըստ ռուսական կողմի՝ հենց Թրամփն է առաջինը առաջարկել Բուդապեշտը՝ որպես հնարավոր հարթակ, իսկ Պուտինն ընդունել է այդ տարբերակը։

Մի շարք փորձագետներ, այդ թվում՝ Ռուսաստանի ԱԳՆ ներկայացուցիչները, նշում են, որ Հունգարիայի ընտրությունը խորհրդանշական է․ երկիրը փորձում է մնալ «նեյտրալ»՝ չեզոք դիրք գրավելով Ուկրաինայի պատերազմի համատեքստում։ Միևնույն ժամանակ, Վատիկանի տարբերակը դիտարկվել է որպես ավելի ճիշտ հարթակ, սակայն Լեոնիդ Սևաստյանովի խոսքով՝ կրոնական տարբերությունը և Ռուսաստանի ու Ուկրաինայի ուղղափառ պատկանելությունը խանգարել են այդ տարբերակին։

Քաղաքագետները չեն բացառում, որ ապագայում բանակցությունները կարող են տեղափոխվել Վատիկան՝ Պապ Լև XIV-ի միջնորդությամբ։ Իսկ մինչ այդ, Բուդապեշտը դառնում է այն եզակի վայրերից մեկը, որտեղ հնարավոր է ռուս-ամերիկյան հանդիպում՝ Եվրոպայի սրտում, ՆԱՏՕ-ի ներսում, բայց միևնույն ժամանակ՝ Ռուսաստանի հանդեպ համեմատաբար բարեկամ երկրում, գրում է Lenta.ru-ն։