Աֆղանստանը և Պակիստանը սկսում են խաղաղ բանակցություններ Դոհայում՝ արյունալի բախումներից հետո

Աֆղանստանի և Պակիստանի պատվիրակությունները ժամանել են Կատարի մայրաքաղաք Դոհա՝ մասնակցելու խաղաղ բանակցություններին՝ հարավասիական երկու հարևանների միջև տեղի ունեցած ամենաարյունալի սահմանային բախումներից հետո։ Երկու կողմերն էլ համաձայնել են երկարաձգել հրադադարը բանակցությունների ամբողջ ժամանակահատվածի ընթացքում, գրում է Reuters-ը։

Աֆղանստանի կառավարության ներկայացուցիչ Զաբիուլլահ Մուջահիդը հայտնել է, որ բանակցություններին կմասնակցի երկրի պաշտպանության նախարար Մուլլա Մուհամմադ Յաքուբը։ Իսկ Պակիստանի կողմից բանակցությունները կղեկավարի պաշտպանության նախարար Խավաջա Մուհամմադ Ասիֆը։ Քննարկումների գլխավոր թեման սահմանային ահաբեկչության դադարեցումն է և խաղաղության վերականգնումը Պակիստան–Աֆղանստան սահմանին։

Բախումները ծագել էին այն բանից հետո, երբ Իսլամաբադը պահանջել էր Թալիբանից զսպել այն զինյալներին, որոնք, ըստ պակիստանցիների, գործում են Աֆղանստանի տարածքից։ Թալիբանները մեղադրանքը մերժել են՝ մեղադրելով Պակիստանին ապատեղեկատվություն տարածելու և Աֆղանստանի ինքնիշխանությունը խաթարելու մեջ։ Կաբուլը նաև դատապարտել է Պակիստանի վերջին օդային հարվածները՝ հայտնելով, որ դրանք խախտում են հրադադարի պայմանները։