ԱՄՆ-ի փոխնախագահ Վենսն ու Թրամփի հատուկ բանագնաց Ուիթքոֆը կայցելեն Իսրայել

ԱՄՆ փոխնախագահ Ջեյ Դի Վենսը և նախագահ Դոնալդ Թրամփի հատուկ բանագնաց Սթիվեն Ուիթքոֆը հաջորդ շաբաթ աշխատանքային այցով կմեկնեն Իսրայել, հայտնում է Ynet-ը։

Ըստ աղբյուրի՝ Վենսը առաջին անգամ կայցելի Իսրայել փոխնախագահի պաշտոնում։ Նրա այցը կհամընկնի Ուիթքոֆի վերադարձին տարածաշրջան, որտեղ վերջինս նախատեսում է քննարկել Գազայի պատերազմը դադարեցնելու համաձայնագրի շարունակական իրականացումը և ՀԱՄԱՍ-ի կողմից պահվող պատանդների վերադարձի հարցը։

The Times of Israel-ը հայտնում է, որ այցը ծրագրված է երկուշաբթի։ Վենսը կքննարկի Թրամփի խաղաղության պլանի երկրորդ փուլը, որը վերաբերում է ՀԱՄԱՍ-ի զինաթափմանը և Գազայի կառավարման համար նոր քաղաքական կառույցի ձևավորմանը։ Այդ ընթացքում ՀԱՄԱՍ-ի քաղաքական բյուրոյի անդամ Մոհամմեդ Նազզալը հայտարարել է, որ խմբավորումը չի կարող երաշխավորել զինաթափումը՝ պահանջելով նախ հստակեցնել, թե «ինչ է իր մեջ ներառում այդ նախագիծը և ում է փոխանցվելու զենքը»։