Financial Times․ ԱՄՆ-ի դեղարտադրությունը մեծապես կախված է Չինաստանի մատակարարումներից՝ դեղագործական բաղադրիչների ոլորտում։

Չինաստանը ստացել է ևս մեկ հզոր լծակ՝ ԱՄՆ-ի նկատմամբ ազդեցություն գործադրելու համար․ բացի հազվագյուտ մետաղներից, Պեկինը հանդիսանում է մի շարք կենսական դեղագործական բաղադրիչների միակ մատակարարը։ Ինչպես գրում է Financial Times-ը, շուրջ 700 դեղամիջոց, որոնք օգտագործվում են ԱՄՆ-ում, պարունակում են նյութեր, որոնք արտադրվում են բացառապես Չինաստանում։ Դրանց թվում են հակաբիոտիկներ, սրտանոթային հիվանդությունների, քաղցկեղի և ալերգիաների բուժման միջոցներ։

Պարբերականը նշում է, որ Դոնալդ Թրամփի սկսած առևտրային պատերազմը ցույց տվեց՝ Վաշինգտոնի ազդեցությունը սահմանափակ է․ Չինաստանը շարունակում է գերիշխել ոչ միայն հազվագյուտ մետաղների, այլև ռազմավարական քիմիական նյութերի շուկայում։ Եթե Պեկինը սահմանափակի արտահանումը, ԱՄՆ-ի արտադրական ոլորտը կկանգնի մի քանի շաբաթում։

FT-ի գնահատմամբ՝ Չինաստանը պատրաստ չէ ամբողջությամբ դադարեցնել մատակարարումները, սակայն իր դիրքը կարող է օգտագործել որպես քաղաքական ճնշման գործիք։ Միևնույն ժամանակ, ԱՄՆ-ի պատժամիջոցային քաղաքականությունը նույնպես չի տվել սպասված արդյունքները․ օրինակ՝ Huawei-ն արագ վերականգնվել է, իսկ նոր տեխնոլոգիական նախագծեր, ինչպիսին է DeepSeek-ը, ապացուցում են, որ Չինաստանի տեխնոլոգիական ներուժը շարունակում է աճել՝ հակառակ սահմանափակումներին։