SCMP․ Ռուսաստանի նավթի ներկրումը Չինաստանի կողմից գնահատվել է որպես «անհնազանդության ակտ» ԱՄՆ-ի նկատմամբ

Չինաստանը շարունակում է մնալ Ռուսաստանի նավթի խոշորագույն գնորդներից մեկը՝ չնայած Վաշինգտոնի ճնշումներին՝ սահմանափակելու այդ մատակարարումները։ Ինչպես գրում է South China Morning Post (SCMP)-ը, սեպտեմբերին ռուսական նավթի ներկրումը Չինաստան աճել է 4,3 տոկոսով՝ կազմելով երկրի ընդհանուր նավթային ներմուծման մոտ 17,5 տոկոսը։

Economist Intelligence Unit-ի ավագ տնտեսագետ Սյու Տյենչենի խոսքով՝ ռուսական նավթի գնումների ավելացումը կարելի է համարել Պեկինի «քաղաքական անհնազանդության ակտ»՝ ԱՄՆ-ի հետ սպասվող բանակցություններից առաջ։ Նրա գնահատմամբ՝ Չինաստանը հազիվ թե հրաժարվի ռուսական էներգակիրներից, եթե Վաշինգտոնը չչեղարկի մաքսատուրքերը և չհանի սահմանափակումները չինական ընկերությունների նկատմամբ։

Հոդվածում հիշեցվում է, որ Պեկինը բազմիցս պաշտպանել է իր էներգետիկ համագործակցությունը Ռուսաստանի հետ՝ այն կոչելով «օրինական և նորմալ առևտրային հարաբերություն»։ Չինաստանը նաև քննադատել է ԱՄՆ-ին՝ մեղադրելով նրան «միակողմանի տնտեսական ճնշման և մատակարարման գլոբալ շղթաները խաթարելու» մեջ։ Նշվում է, որ միաժամանակ Պեկինը կտրուկ ավելացրել է նավթի ներկրումը նաև Ինդոնեզիայից՝ 2025 թվականի սեպտեմբերին գրանցելով 73-ապատիկ աճ՝ նախորդ տարվա համեմատ։