Եվրոպական առաջնորդները և Զելենսկին հայտարարություն են տարածել Ուկրաինայի վերաբերյալ

Եվրոպական առաջնորդները և Ուկրաինայի նախագահ Վոլոդիմիր Զելենսկին հանդես են եկել համատեղ հայտարարությամբ, որում համաձայնություն են հայտնել ուկրաինական հակամարտության կարգավորման հարցում ԱՄՆ նախագահ Դոնալդ Թրամփի դիրքորոշման հետ և կոչ են արել ուժեղացնել ճնշումը Ռուսաստանի վրա: Նրա տեքստը հրապարակվել է Մեծ Բրիտանիայի կառավարության կայքում։

«Մենք բոլորս միասնական ենք մեր ձգտման մեջ դեպի արդար և կայուն խաղաղություն, որին արժանի է Ուկրաինայի ժողովուրդը։ Մենք վճռականորեն պաշտպանում ենք նախագահ Թրամփի դիրքորոշումն առ այն, որ ռազմական գործողությունները պետք է անհապաղ դադարեցվեն, իսկ ներկայիս շփման գիծը պետք է դառնա բանակցությունների մեկնարկային կետը», - ասված է հայտարարության մեջ:

Եվրոպական առաջնորդները պատրաստակամություն են հայտնել ուժեղացնել ճնշումը Ռուսաստանի տնտեսության և պաշտպանական արդյունաբերության վրա, ինչպես նաև հայտարարել են միջոցներ մշակելու մասին, որոնք թույլ կտան «օգտագործել Ռուսաստանի սառեցված սուվերեն ակտիվների ողջ ներուժը, որպեսզի Ուկրաինան ստանա իրեն անհրաժեշտ ռեսուրսները»: Նշվում է, որ Կիևին հետագա աջակցության հարցերը կքննարկվեն Եվրոպական խորհրդի և «աջակիցների կոալիցիայի» առաջիկա հանդիպումներում, որոնք տեղի կունենան այս շաբաթ: