Մարկ Ուոլբերգը Ֆլորիդայում գնել է շքեղ առանձնատուն՝ 37 միլիոն դոլարով

Հոլիվուդյան հայտնի դերասան Մարկ Ուոլբերգը ձեռք է բերել շքեղ առանձնատուն ԱՄՆ Ֆլորիդայի նահանգում՝ 37 միլիոն դոլար արժողությամբ։ Ինչպես գրում է New York Post-ը, տունը գտնվում է փակ էլիտար «Stone Creek Ranch» թաղամասում՝ Դելրեյ Բիչ քաղաքի արևմտյան հատվածում։

Առանձնատունը զբաղեցնում է շուրջ 1,6 հազար քմ տարածք և գտնվում է մեկ հեկտար հողամասի վրա՝ լճի տեսարանով։ Սկզբում անշարժ գույքը վաճառքի էր հանվել 45 միլիոն դոլարով, սակայն Ուոլբերգը այն գնել է ավելի ցածր գնով՝ ներառյալ ամբողջ կահավորանքը։

Տան ինտերիերը ձևավորված է բարձր առաստաղներով, փայտե և մարմարե տարրերով։ Այն ներառում է աշխատասենյակ, տնային կինոթատրոն, մարզասրահ, սաունա և մերսման սենյակ։ Տարածքում կան նաև լողավազան և տենիսի դաշտ։ Նշենք, որ վերջերս բրիտանացի մոդել Կարա Դելևինը վաճառքի է հանել իր Նյու Յորքի պենթհաուսը՝ 11 միլիոն դոլարով։